Тўртликлар | 9:17 PM |
Кўзгуга алданиб ўтаверамиз,
Дунёдан туҳфалар кутаверамиз.
Ҳаётда кимнингдир этагин тутмай,
Фақат ёқасидан тутаверамиз.
* * *
Дунё – бир ҳийлагар, турфа ёғдуси,
Шарбатга ўхшайди тутар оғуси...
Туғилган онингда қувониб шодон,
Кетганингда ёлғон йиғлаб қолгуси.
* * *
Чап елкамнинг фариштасин азобга қўйдим,
Ёзавериб-ёзавериб толиб кетибди.
Ўнг елкамнинг фариштасин дафтари ҳатто
Муқоваси очилмасдан қолиб кетибди.
* * *
Оҳ чекма, ғам елин уфурсалар ҳам,
Ҳовлингга ҳасадни супурсалар ҳам.
Ерни кўр, заррача қилмас маломат,
Тузин еб, юзига тупурсалар ҳам.
* * *
Фойда учун узатилар қўл,
Нафс амри-ла муштаракдир йўл.
Дўстлик фойда учунми, дема,
Бу ҳозирги "янгича усул”.
|
Kategoriya: Turli hil mavzular |
O'qishlar soni: 3871 | Yubordi: Баҳодир ОБИД |
Joylashtirdi: JET
| Reyting: 0.0
|
