Osmon ham bir nafas zaminga tushdi,
Atirgul ko’ziga yosh keldi lim-lim.
Qirda baxtdan yonib ketdi lolalar,
Sen qachon baxtiyor bo’lasan, ko’nglim.?
Yo’llarga tomchilab to’kilar yurak,
Armon vujudimda oqadi sim-sim.
Baribir to’lmas-ku bu kemtik bag’ir.
Sen qachon baxtiyor bo’lasan, ko’nglim.?
Axir, ko’rganlarim bari tush edi,
O, seni Xudoning yo’lida suydim.
Aslida biri kam edingmi, dunyo?!
Men bugun baxtni ham so’ramay qo’ydim

Kulsam yarashardi yuzimga kulgu, 
So’roqlar bermasdim qahrli tunga.
Ko’zlarim yig’lashni bilmas edi-ku,
Nelarni o’rgatib ketdingiz menga.
Siz bilan hayotim baxtiyor edi,
Xayollar bag’rida yashardim sarmast.
Kim ham ahvolimni so’rardi endi,
Endi orzular ham menga ishonmas.
Tunlarning bag’rida qolib ayriliq,
Sevgimiz qoshida yig’lar har kuni,
Siz kabi dardlarim tinglaguvchi yo’q,
Kimlarga ishonib ketdingiz meni…