Yuragingda  darding  borga  o’xshaydi,
Devorda  shumshayib  turibsan , yakka.
O’zingni  oldirib  qo’ydingmi  biroz ?
Ahvolingga  qara,  shaharlik  hakka !

Bunchalar  yupinsan,  yoki  ishongan
Do’stlaring  patingni  yulib  ketdimi ?
Atrofga  jovdirab  qolibsan,  gapir,
Ochlikdan  madoring  qurib  ketdimi ?

Shovqinga  parvoying  kelmaydi,  yoki
Hammasiga  yumib  qo’yding  ko’zingni.
Qandoq  yashayapsan,  o  bechora  qush,
Shaharga  qildirib  xafa  o’zingni ?

Undan  ko’ra  mening  qishlog’imga  o’t,
Bog’da  uzum  pishgan,  mehmon  qilaman.
Xohlasang,  oldingga  tarvuzlar  so’yib,
Xohlasang,  sen  uchun  qovun  tilaman.

Ichsang,  obihayot  suvlar  seniki,
Yoqsa  gar,  bir  umr  bizda  qolaver.
Qani  ”quv-v”,  ko’targin  qanotlaringni,
Dehqonobod  deya  uchib  boraver.