Tuni  chiroq  bilan  yorishgan  shahar,
Baribir  oy  bo’lib  to’lolmaysan  sen.
Kuni  shovqin  bilan  qorishgan  shahar,
Bitta  qishlog’imcha  bo’lolmaysan  sen.

Bormi,  a ,  senda  ham  oppoq  soqollar ?
Duoga  qo’l  ochgan  kampirlar  qani ?
To’kilib  bitsa  ham  bari  ohorlar,
Savatlab  non  sochgan  tandirlar  qani ?

Afzaldir  men  uchun  yanog’i   bilan
Quyoshning  taftidan  nur  olgan  qishloq.
Tilla  qo’lidagi  qadog’i   bilan
Qaro  yer  bag’ridan  dur  olgan  qishloq.

Kunlarim  o’tsa – da  bag’ringda  to’lib,
Manguga  sening - la  qololmayman  men.
Suyanch  bo’lolmaysan ,  eh ,  otam  bo’lib,
Onamdek  ko’nglimni  ololmaysan  sen.

Hayoti  farovon ,  gavjum  yo’llari ,
Rivoji  bog’lardek  gullagan  shahar.
Senga  ham  ko’nglim  bor ,  saxiy  qo’llari
Jaloliddinni  ham  qo’llagan  shahar.