Kelin-kuyov bahtli, tahtli bo'lsin deya,
Niyat qilib chimildiqni bezatdilar.
Sho'x yangalar o'lanlar-u yor-yor aytib,
Sevganimni begonaga uzatdilar.

Taqdir menga buncha bag'ritosh keldi,
Ko'zim kular yuragimdan yosh keldi,
Yor deganim o'zgaga yo'ldish endi,
Sevganimni begonaga uzatdilar.

Qayda xato o'tdi mendan bilolmadim,
Yuragimni hanjar bilan tilolmadim,
To'yga borib unga baht ham tilolmadim,
Sevganimni begonaga uzatdilar.

Ikkita qilolmadi ota so'zini,
Bevafo deb atamasman hecham uni,
Yoqtirganim yomg'ir mayda yoqqan kuni,
Sevganimni begonaga uzatdilar.

Kelin-kuyov bahtli, tahtli bo'lsin deya,
Sevganimni o'zga uyga kuzatdim men.
Taqdirga tan ne ham qilardim,
Yuragimni armonlarga uzatdim men.