Qizlar, sizga arzim bor,
Toliqib qolmang turib.
Boshlayman bir chekkadan,
Eshiting jim o’tirib.
Mayli, bugun maydagap
Bo’laqolay, jon qizlar.
So’zla, deydi tillarim,
Yurak bo’ldi qon, qizlar.
Tan bermadim unchalik
Poshnangizning uchiga.
Qocholmaysiz, quvlasa
Teshavoyning kuchugi.
Momom aytgan: “Sochlarim
Tizzagacha o’sardi”.
Sizda ham o’ssin, hech yo’q
Belingizni to’sardi.
Yelka ochiq, bel-ku.., eh,
Qani nomus, or, qizlar?
Kammidi-ya shunchasi,
Shimga nima bor qizlar?
Shim kiyib o’tsa, (qarang!)
Mullaxonning xotini,
Hurkitarmish har safar
Elomonning otini.
Nigohingiz yovqarash,
Erkakchadir qadamlar.
(Mehr to’la ko’zlarga
Nima bo’ldi odamlar ?!)
Eh qizlarjon, qalam, men –
Kim edikki o’zimiz,
Sizdek bag’ritoshlarga
O’tar bo’lsa so’zimiz.
Yuravering chopqilab,
Zamonaga tenglashib.
Soxta kiprik, kalta soch,
Yana kalta yenglashib.
Hafa bo’lmang, singlimdek
G’amingizni yeyman-da.
Shu ketishda kuyovsiz
Qolib ketmang, deyman-da.
|